பாராளுமன்றத் தேர்தலால் எனக்கென்ன ஆச்சு!

களத்  தேர்தல் முடியுமட்டும் அறிக்கை-பின்பு 

கனிவு கொடுக்கும் கொழும்பில் ஓய்வு 

வெற்றியடைந்தால் வெளிநாட்டில் விளையாட்டு -இது 

முத்தமிழர் அறிந்தது தானே தப்பா!,

பிறந்தது நாங்கள் அடிவாங்க -முழுதும் 

பேசுவதும்,கூட்டங்கள் போடுவதும் நீங்க,

சுற்றம் சூழ ஈரோப்புக்கு போங்க -அடுத்த 

தேர்தலுக்கு கட்டாயம் வாங்க   

ஏருபிடித்து நானுழைத்து நாளாகிப் போச்சு -இருந்த 

எருமையும் கண்டும் யுத்தத்தில் போச்சு 

பாராளும் இறைவனுக்கும், பார்வை போச்சு -இந்தப் 

பாராளுமன்றத் தேர்தலால் எனக்கென்ன ஆச்சு! 

ரோட்டிலே நான்போக,நீபோக முடியுமா? -நடு

வீட்டிலேயே நான் இருக்க முடிந்ததா?

காட்டிலும் கூட கால்வைக்கலாகுமா?-நான் 

பட்ட கஷ்டம்  நீ அறியக்கூடுமா? 

எல்லா  இறப்பும் அறிந்துவிட்டேன்  -இருந்த 

எல்லாம் முழுசாக  இழந்தும் விட்டேன்   

பொல்லாத நேரம் கல்லாக இருந்து விட்டு  -எதுவும் 

இல்லாத போது எதுவும் சொல்லாதே!

தமிழர் பூமியை மீண்டும் இணைக்கவும்-இன்பத் 

தமிழ் மொழியை அழியாமல்  காக்கவும்

தமிழன் ஒருவன் இருந்தாலே போதும்-அவன்  

தமிழுக்காய் இந்தத்  தரணியையே மீட்பான்!  

அன்புடன்! .....

பாராளுமன்றம், தேர்தல், தமிழ் மக்கள்,