கடத்திய தமிழர்களை கொன்றபின்னர் வேன் துண்டுகளாக வெட்டப்பட்டுள்ளது
சி.ஐ.டி.மன்றுக்கு அறிவிப்பு
(எம்.எப்.எம்.பஸீர்)
கொட்டாஞ்சேனையில் கடந்த 2009 ஆம் ஆண்டு கடத்தப்பட்டு காணாமல்போகச் செய்யப்பட்ட வடிவேல் பக்கிளிசாமி லோகநாதன், இரத்னசாமி பரமானந்தன் ஆகியோர் படுகொலை செய்யப்ப்ட்டுள்ளதாகவும் அதனை மறைக்கவே அவர்கள் பயணித்த வேனை வெலிசறை கடற்படை முகாமுக்குள் வைத்து துன்டு துன்டாக வெட்டியுள்ளதாகவும் குற்றப் புலனாய்வுப் பிரிவினர் தெரிவிக்கின்றனர்.
கடந்த 14 ஆம் திகதி இந்த விவகாரம் தொடர்பில் கைது செய்யப்பட்ட வெலிசறை கடற்படை வைத்தியசாலையின் நிறைவேற்று அதிகாரம் கொண்ட லெப்டினன் கொமாண்டர் தம்மிக அணில் மாபாவுக்கு மேலதிகமாக இவர்கள் விரைவில் கைது செய்யப்படவுள்ளதாகவும் குற்றப் புலனாயவுப் பிரிவின் கூட்டுக் கொள்ளை தொடர்பிலான விசாரணை பிரிவின் பொறுப்பதிகாரி நிசாந்த டி சில்வா கொழும்பு மேலதிக நீதிவான் ஜெயராம் டொஸ்கியிடம் நேற்று தெரிவித்தார்
கடத்தப்பட்டோருக்கு சொந்தமான வேனில் குண்டு இருந்ததாக சந்தேக நபர்கள் சார்பில் கூறப்படுவது முற்றிலும் உண்மைக்கு புறம்பானது எனவும் அவர் குறிப்பிட்டார்.
தற்போது கடற்படை தலைமையகத்தில் சேவையாற்றும் ரியல் அத்மிரல் ஆனந்த குறுகே மற்றும் லெப்டினன் கொமாண்டர் தயானந்த ஆகியோரையே இவ்விவகாரத்தில் விரைவில் கைது செய்யவுள்ளதாக பொலிஸ் பரிசோதகர் நிசாந்த சில்வா அறிவித்தார்.
2009 ஆம் ஆண்டு ஜனவரி மாதம் 11 ஆம் திகதி கொட்டாஞ்சேனையில் இருந்து வெல்லம்பிட்டிய பகுதியை நோக்கி தனது பீ.ஏ.6023 என்ற இலக்கத்தை உடைய வேனில் பயணித்த போது கடத்தப்பட்ட வடிவேல் பக்கிளிசாமி லோகநாதன் மற்றும் உறவினரான பொரளை, வனாத்தமுல்லையைச் சேர்ந்த இரத்னசாமி பரமானத்தன் ஆகியோரது கடத்தல் தொடர்பிலான வழக்கு நேற்று விசாரணைக்கு வந்ததது.
இதன் போதே குற்றப் புலனாயவுப் பிரிவின் கூட்டுக் கொள்ளை தொடர்பிலான விசாரணைப் பிரிவின் பொறுப்பதிகாரியும் கடத்தல்கள் தொடர்பிலான சிறப்பு விசாரணையாளருமான பொலிஸ் பரிசோதகர் நிசாந்த டி சில்வா இந்த விடயங்களை நீதிமன்றுக்கு அறிவித்தார். இதன் போது அவர் நீதிவான் ஜெயராம் டொஸ்கியிடம் சிறப்பு மேலதிக அறிக்கையொன்றை மன்றுக்கு தாக்கல் செய்தார்.
' கனம் நீதிவான் அவர்களே, முன்னாள் கடற்படை தளபதி வசந்த கரண்ணாகொட கடந்த 2009ம் ஆண்டு மே மாதம் 28ம் திகதி தனது தனிப்பட்ட பாதுகாப்பு உத்தியோகத்தரான லெப்டினன் கொமாண்டர் முனசிங்க ஆரச்சிகே தொன் நிலந்த சம்பத் முனசிங்கவுக்கு எதிராக செய்த முறைப்பாடானது மேலதிக விசாரணைகளுக்காக முன்னாள் பொலிஸ் மா அதிபரினால் 2009 ஜூன் 10ம் திகதி பொலிஸ் மா அதிபரால் குற்றப் புலனாய்வுப் பிரிவுக்கு பாரப்படுத்தப்பட்டது.
இந் நிலையில் நாம் முன்னெடுத்த விசாரணைகளில் சம்பத் முனசிங்கவின் கீழ் இருந்த கரண்ணாகொடவின் பாதுகாப்பு அணியில் இருந்த லெப்டினன் கொமாண்டர் ஹெட்டிஆராச்சி முதியன்சலாகே சந்தன பிரசாத் ஹெட்டி ஆராச்சியின் கீழான குழுவே இந்த கடத்தல்களை முன்னெடுத்திருந்தமை தெரியவந்தது.
எலகந்த, கொட்டாஞ்சேனை, கொழும்பு 13, தெஹிவளை - பெர்ணான்டோ வீதி, கட்டுநாயக்க விமான நிலையம் உள்ளிட்ட பகுதிகளில் இருந்து பல்வேறு உக்திகளை பயன்படுத்தி இக்கடத்தல்கள் முன்னெடுக்கப்பட்டுள்ளன.
சூசைப்பிள்ளை அமலன் லியோன், ரொஹான் ஸ்டென்லி லியோன், கஸ்தூரி ஆரச்சிகே எண்டன், கஸ்தூரி ஆரச்சிகே ஜோன் ரீட், ரஜீவ் நாகநாதன், பிரதீப் விஸ்வநாதன், திலகேஷ்வரம் ராமலிங்கம், மொஹமட்டிலான் ஜமால்டீன், சாஜித் மொஹம்மட், அலி அஸ்வர் அல்லது ஹாஜியார் ஆகிய 11 பேர் கடத்தப்பட்டு திருகோணமலை கடற்படை முகாம் வளாகத்தில் உள்ள கடல் மற்றும் சமுத்திரவியல் விஞ்ஞான பீடத்தின் அருகே உள்ள கண்சைட் எனும் நிலத்தடி சிறைக் கூட்டில் அடைக்கப்பட்டுள்ளனர்.
கொமாண்டர் ரணசிங்க சுமித் ரணசிங்க என்பவரின் கீழ் இருந்த அந்த சிறையில் சட்ட விரோதமாக மனித உரிமைகள் மீறப்படும் வண்ணம் இவர்கள் தடுத்து வைக்கப்பட்டுள்ளனர். இந் நிலையில் கடந்த 2008 ஆகஸ்ட் 9ம் திகதி 38/28 ரத்னம் வீதி கொட்டாஞ்ச்சேனை எனும் முகவரியைச் சேர்ந்த கஸ்தூரி ஆராச்சிகே ஜோன் ரீட் கடத்தப்பட்ட போது அவரது 56 - 5536 எனும் டொல்பின் ரக வானும் எடுத்துச் செல்லப்ப்ட்டிருந்தது. இந்த வேனானது கடற்படை இலக்கத்தகட்டுடன் 6021 எனும் இலக்கத்தின் கீழ் திருகோணமலை கடற்படை முகாமில் பயன்படுத்தப்பட்டுள்ளது.
இதனை புலனாய்வுப் பிரிவினர் கடந்த 2015 நவம்பர் 18 ஆம் திகதி கைப்பற்றினர்.. தற்போது அந்த வான் திருகோணமலை குற்றப் புலனாய்வுப் பிரிவு அலுவலகத்தில் உள்ளது. இந்த வாகனத்தின் கதவுகள் வெலிசறை கடற்படை முகாமின் உளவுப் பிரிவுக்கு சொந்தமான இரகசிய அறை ஒன்றில் இருப்பதாக மேலதிக விசாரணைகளில் புலனாயவுப் பிரிவுக்கு தகவல் கிடைத்தது. அதன்படி நீதிமன்ற உத்தரவைப் பெற்று அங்கு தேடுதல் நடத்தினர்.
2016 ஆம் ஆண்டு பெப்ரவரி 11 ஆம் திகதி நாம் செய்த சோதனையில் 72 துண்டுகளாக பிரிக்கப்பட்ட வாகனம் மீட்கப்பட்டது. அத்துடன் அந்த அறையில் சீ.ஜீ 125 ஈ - 1810450 எனும் எஞ்சின் இலக்கத்தைக் கொண்ட மோட்டார் சைக்கிள் ஒன்றும் கண்டுபிடிக்கப்பட்டது. 37வது துண்டில் இருந்து வான் ஒன்றின் செஸி இலக்கம் இரசாயன பகுப்பாய்வு மூலம் கண்டறியப்பட்டது. அதுவே காணாமல் போன வடிவேல் லோகநாதன் என்பவருக்கு உரியது என்பது அப்போதே தெரியவந்தது.
இதனையடுத்தே கொழும்பு குற்றத்தடுப்புப் பிரிவிடம் இருந்த லோகநாதன் மற்றும் அவருடன் வேனில் வெல்லம்பிட்டி நோக்கி பயணிக்கும் போது காணாமல் போன ரத்னசாமி ஆகியோர் தொடர்பிலான விசாரணைகளை புலனாய்வுப் பிரிவினர் ஆரம்பித்தனர்.
இதன் போது பரமானந்தன் பயன்படுத்திய தொலைபேசியில் 0773952046 எனும் இலக்க சிம் அட்டை உட்செலுத்தப்பட்டு பயன்படுத்தப்பட்டுள்ளமை எமி இலக்கம் ஊடாக கண்டுபிடிக்கப்பட்டது. அந்த கையடக்கத் தொலைபேசியானது பஸ் ஒன்றில் விழுந்து கிடந்ததாக கூறி கடற்படை வீரர் ஒருவரினால் கொழும்பு குற்றத் தடுப்புப் பிரிவில் கையளிக்கப்பட்டுள்ளது. அதனை இவ்வாறு வேறு இலக்கத்தில் பயன்படுத்தியவர் தற்போதையை லெப்டினன் கொமாண்டர் தயாநந்த என்பது எமது விசாரணைகளில் தெரியவந்தது.அதற்கு மேல் அந்த விசாரணை இடம்பெறாது அவை மூடி மறைக்கப்பட்டுள்ளன. என்பது புலனாய்வுப் பிரிவினரால் கண்டறியப்பட்டது. அது தொடர்பில் அப்போது உப பொலிஸ் பரிசோதகர் விஜேசிங்க முன்னெடுத்திருந்த நிலையில் அது தொடர்பில் நாம் அவரிடம் வாககு மூலம் பதிவு செய்தோம். இதனைவிட விஜேசிங்கவின் மேலதிகாரியாக அப்போது கொழும்பு குற்றத்தடுப்புப் பிரிவின் (சி.சி.டி.) 3 ஆம் இலக்க விசாரணை அறையின் பொருப்பதிகாரி பொலிஸ் பரிசோதகர் பிரியங்கரவிடமும் நாம் வாககு மூலம் பெற்றோம்.
பொரளை, கொட்டாஞ்சேனை கொழும்பு குற்றத் தடுப்புப் பிரிவினரின் ஆரம்ப விசாரணைகள் உரிய முறையில் இடம்பெறவில்லை. அவர்களும் பொறுப்பற்று செயற்பட்டு தகவல்களை மறைத்துள்ளனர். வடிவேல் பக்கிளிசாமியின் தொலைபேசியை வெலிசறை முகாமில் புலனாய்வுப் பிரிவில் கடமையாற்றிய லெப்டினன் கொமாண்டர் தொன் சுமேத சம்பத் தயானந்த என்பவரே கண்டெடுத்து கொடுத்துள்ளமையும் அவருக்கும் அவரது குழுவுக்கும் தெரிந்தே இவரின் கடத்தல் இடம்பெற்றுள்ளமையும் புலனயவாளர்களால் கண்டறியப்பட்டது. அப்போது காணாமல் போனோரின் தொலைபேசி இலக்கம் ஊடாக இக்கடத்தல் தொடர்பில் பொலிசார் தகவல்களை வெளிப்படுத்தி கடற்படை வீரர் ஒருவரை கைது செய்யவும் தயாராகியுள்ளனர்.
அதாவது காணாமல் போனவரின் கையடக்கத் தொலைபேசியை பொலிசாரிடம் ஒப்படைத்தவரையே கைது செய்ய முனைந்துள்ளனர். இதன் போது அப்போது கொழும்பு குற்றத்தடுப்புப் பிரிவின் பணிப்பாளராக இருந்த அதிகாரியால் முட்டுக்கட்டை ஏற்படுத்தப்ப்ட்டு ஒரு கட்டத்தில் அதனை ஆராய வேண்டாம் என உத்தர்வும் பிறப்பிக்கப்பட்டுள்ளது.
இதனையடுத்து இது தொடர்பில் தீவிர விசாரணைகளை ஆரம்பித்த நாம் நேற்று முன் தினம், லோகநாதனின் வேனை 72 துண்டுகளாக வெட்டியதாக நம்பப்படும் சந்தேக நபர் கடற்படை லெப்டினன் கொமாண்டர் தம்மிக அணில் மாபா வைக் கைது செய்தோம். முன்னெடுக்கப்பட்ட விசாரணைகளில் அவரே வேனை துண்டு துன்டாக வெட்டியதை ஒப்புக்கொன்டுள்ளார்.
வெலிசறை முகாமுக்கு முன்பாக அவ்வேன் இருக்கும் போது, தனக்கு கெப்டன் குருகே அவ்வேனில் குண்டுள்ளதாக கூறி சோதனை செய்யச் சொன்னதாகவும் அதற்காகவே அதனை துண்டு துண்டாக வெட்டியதாகவும் அவர் ஒப்புக்கொண்டார்.
நாம் அந்த வெலிசறை முகாமுக்கு சாட்சியாளர்கள் 5 பேரை அழைத்து சென்ற போது அங்கிருந்த மோட்டார் சைக்கிள் ஒன்றினை அவர்கள் அடையாளம் கண்டனர்.
வேனில் குண்டு இருந்ததாக கூறப்படுவது முற்றிலும் உண்மைக்கு புறம்பானதாகும். அதில் குண்டு இருந்ததா என பரிசோதிக்க வெளியில் இருந்த வேனை முகாமுக்குள் கொண்டுசென்றுள்ளனர். இது முற்றிலும் வேடிக்கையானது. அத்துடன் இது குறித்து யாருக்கும் அறிவிக்கவில்லை. அத்துடன் குண்டு இருந்திருப்பின் அதனை கொன்டுவந்தவர்களை யேன் 8 வருடமாகியும் தேடவில்லை.
கடத்தியவர்களை கொலை செய்துவிட்டு அதனை மறைக்கவே வேனை முகாமுக்குள் எடுத்து துண்டு துண்டாக வெட்டியுள்ளனர். கடத்தப்பட்டவர்களது உடமைகள் கொள்ளையிடப்பட்டுள்ளன., தொலைபேசிகள் கடற்படையின் பலரால் பயன்படுத்தப்பட்டுள்ளன. தங்க நகைகள் கொள்ளையிடப்பட்டுள்ளன.
இந்த குற்றம் தொடர்பில் அனைவரும் கைது செய்யப்படுவர் என்றார்.இதனையடுத்தே சந்தேக நபரான லெப்டினன் கொமாண்டர் தம்மிக அணில் மாபாவை எதிர்வரும் பெப்ரவரி மாதம் 23 ஆம் திகதிவரை விளக்கமறியலில் வைக்க நீதிவான் ஜெயராம் டொஸ்கி உத்தரவிட்டார்.
Virakesari 10/02/2017
