பத்தும் பலதும்

வியாழன், 30 டிசம்பர், 2010

நான் கண்ட இராமேஸ்வரம்! .

நான் கடந்த ஆகஸ்ட் மாதம் 2010 இந்தியாவின் தலை நகர் புது டில்லிக்கு,எனது மகளின்

நேர்முகத் தேர்வுக்கு செல்லவேண்டிய ஒரு சந்தர்ப்பம் கிடைத்தது. டெல்லி சென்று திரும்பும்போது, பெங்களூர்,தமிழ்நாடு போன்ற இடங்களையும் பார்வையிட ஒரு சந்தர்ப்பம் கிடைத்தது, இது இராமேஸ்வரம் கோயிலுக்குச் சென்றபோது எடுக்கப் பட்ட

படங்கள். எப்படி இருக்கிறது? நான் பிறந்த நாட்டுக்கு இந்த நாடு பெரியதுதான்.

தூர்தர்சன் கோபுரம்

பாம்பன் பாலம்

பாம்பன் பாலத்தில் ரயில் பயணம் .

பாலத்தின் உள்ளே.....

பாலத்தை பார்த்தபடி நான் ...

புறப்படும் நேரம்..

இராமேஸ்வரம் கோபுர தரிசனம்.

தூர்தர்சன் கோபுரம்

இன்னும் வரும்.

திங்கள், 27 டிசம்பர், 2010

பதினாறு பேறு.

தமிழ் பண்பாட்டில் தமிழர்களின் சைவத் திருமணச் சடங்குகளில் "ஆல் போல் தழைத்து அறுகு போல் வேரூன்றி மூங்கில் போல் சுற்றம் முழுமையாய்ச் சூழப் பதினாறும் பெற்றுப் பெருவாழ்வு வாழ்க” என வாழ்த்தப்படுகின்றது. வாழ்த்துதல்,ஆசிர்வதித்தல் என்பவைகள்,அன்றாட வாழ்க்கையில் இடம்பெறும் முக்கிய நிகழ்வுகளில் ஒன்றாகும். வாழ்த்தும்போதும்,ஆசிர்வதிக்கும்போதும் எல்லோராலும் கூறப்படும்.வார்த்தை இந்தப் பதினாறு பேறு. இந்தப் பதினாறு பேறுக்குள் அடங்கியிருப்பது என்ன?.

எனது நண்பன் ஒருவர் கூறினார் பதினாறு பிள்ளைகளைப் பெற்று பெருவாழ்வு வாழ்வதுதான்.பதினாறு பேறு என்பதன் கருத்தென்றார். இரண்டு பிள்ளைகளைப் பெற்றவர்களே துண்டைக்காணோம்,துணியைக்காணோம் என்று ஓடிக்கொண்டிருக்கும்போது,பதினாறு பிள்ளைகளைப் பெறுவதென்பது நடக்கக்கூடிய காரியமா? கட்டுபடியாகிகின்ற ஒரு சாதனை தானா என்ற கேள்வியின் தேடல்தான் இந்தப்பதிவு.

கலையாத கல்வி

கபடற்ற நட்பு

குறையாத வயது

குன்றாத வளமை

போகாத இளமை

பரவசமான பக்தி

பிணியற்ற உடல்

சலியாத மனம்

அன்பான துணை

தவறாத சந்தானம்

தாழாத கீர்த்தி

மாறாத வார்த்தை

தடையற்ற கொடை

தொலையாத நிதி

கோணாத செயல்

துன்பமில்லா வாழ்வு

.இதைத்தான் கவி காளமேகப் புலவர் இப்படிக் கூறினாரோ.

துதிவாணி வீரம் விசயம்சந்தானம் துணிவுதனம்
மதிதானியம் சௌபாக்கியம் போகம் - அறி(வு)அழகு
புதிதாம் பெருமை அறம்குலம்நோவகல் பூண்வயது
பதினாறுபேறும் தருவாய்மதுரைப் பராபரனே

இதையே அபிராமி பட்டர் இன்னும் ஒருபடி மேலே சென்று என்ன அழகாகக் கூறியிருக்கிறார். பாருங்கள்

கலையாத கல்வியும் குறையாத வயதும் ஓர்
கபடு வாராத நட்பும்
கன்றாத வளமையும் குன்றாத இளமையும்
கழுபிணியிலாத உடலும்
சலியாத மனமும் அன்பகலாத மனைவியும்
தவறாத சந்தானமும்
தாழாத கீர்த்தியும் மாறாத வார்த்தையும்
தடைகள் வாராத கொடையும்
தொலையாத நிதியமும் கோணாத கோலுமொரு
துன்பமில்லாத வாழ்வும்
துய்யநின் பாதத்தில் அன்பும் உதவிப் பெரிய
தொண்டரொடு கூட்டு கண்டாய்
அலையாழி அறிதுயிலும் மாயனது தங்கையே
ஆதிகடவூரின் வாழ்வே!
அமுதீசர் ஒருபாகம் அகலாத சுகபாணி
அருள்வாமி! அபிராமியே!

இவை எல்லாம் சரிதான்,ஆசிர்வதிப்பவர்கள் வாழ்த்துபவர்கள் மணம் கனிந்து வாழ்த்த
வேண்டும்.அவர்கள் மணம் கனிந்து வாழ்த்தினால்தான் இந்தப் பதினாறில் ஒன்றாவது,
நம்மை வந்து சேரும்.வயிறு எரிந்து வாழ்த்தி, ஆசிர்வதித்தால், எந்தவித பயனும் கிடைக்கப் போவதில்லை.

இனிய கிறிஸ்துமஸ் மற்றும் புத்தாண்டு வாழ்த்துக்கள்.!

ஞாயிறு, 26 டிசம்பர், 2010

.இதயத்தைவிட்டகலாத ஈழத்துப் பூராடனார்

இதயத்தைவிட்டகலாத ஈழத்துப் பூராடனார்

துள்ளுறாலுந் தேனிறாலும் தோகையர்தம் துவரிறாலும்

அள்ளுசுவை மயக்கினிலே அகப்பொருளின் சிறப்போங்கும்

விள்ளுதமிழ் தோழ் வலியார் வீரமதிற் புரமொளிரும்

வெள்ளமெனக் கவிப்பாடி விரிநிலமார் இருதிணையே.

ஈழத்துப் பூராடனார்.

(மட்டக்களப்பு மாநிலத்தின் வளம் -02 -11 -1991 )

   இலக்கிய மணி திரு.சாமுவேல் கதிர்காமத்தம்பி செல்வராசகோபால்.
   (13.12.1928 -- 20.12.2010)

மீன் பாடும் தேனாட்டின்-இன்பத்
தேன்பாயத் தமிழ் யாத்த,
வானுயர் பெருமை கொண்ட -எங்கள்
தேனூர் பூராடன் புகழ் வாழ்கவே.

காலத்தின் கட்டாயம் உன்னை விரட்டினாலும்
கோலத்தைக் கொண்ட கொள்கையாய்க் கொண்டு
ஞாலத்தைத் திரும்பவைத்த தெய்வத் தமிழ்மகனே,-தமிழ்ப்
பாலத்தைத் திறந்துவைத்துப் பரலோகம் சென்றாயோ?

இங்கிருந்தாலும் இப்படி இந்தச்சேவை செய்யமுடியாது -ஆனாலும்
அங்கிருந்து தமிழ் அவனிக்கு ஆற்றியது பல்லாயிரம்
எங்கிருந்தாலும் இன்பத்தமிழ், உன் உயிர் மூச்சு!--என்றும்
மங்காது உனது புகழ், மறவாது உனது தமிழ்ப் பேச்சு!

தித்திக்கும் இன்பத்தமிழ் இணைந்திருக்க --உலகின்
எத்திக்கும் யுன் புகழ் பரந்திருக்க
பக்திக்கு தமிழ் மக்கள் பரந்திருக்க --ஜீவ
முத்திக்கு எங்கு சென்று நீ முயன்றாய்?

வார்த்தைகளை வளைக்க முடியவில்லை யுன் --தமிழ்ப்
போர்த் துடிப்பை மதிக்க முடியவில்லை
யார் நினைத்தார் இம் முடிவை --பாரில்
மார்தட்டி வாழ வழி வகுத்தவனே. !

நான் ஆரம்பப் பாடசாலையில் (மட் /தேற்றாத்தீவு றோமன் கத்தோலிக்க தமிழ்க் கலவன்
பாடசாலையில்)முதலாம் வகுப்பிருந்து ஐந்தாம் வகுப்புவரை படித்த நேரம்,1962 -1966 எனக்கு படிப்பித்த, வகுப்பாசிரியராக இருந்தவர்களில் திருமதி பசுபதி செல்வராசகோபால் அவர்களும் ஒருவர். அத்துடன் அவரது கடைசி மகன் ரிச்சட் சந்திரா எனது வகுப்பில் தான் படித்திருந்தார். அந்நாளில் அவர்களது வீட்டில்,மனோகரா அச்சகம் இருந்தது.அங்கு
அச்சடிக்கப்பட்ட "சாந்தி மார்க்கம்" ஜீவா பிரசுரம் என்ற புத்தகத்தின் உறை இந்த ரிச்சட் சந்திரா என்பவரால் பாடசாலையில் படிக்கும் அவரது நண்பர்களுக்கு வழங்கப்படும இவற்றைப் பெற்றுக்கொள்வதற்கு மனோகரா அச்சகத்திற்க்குச் சென்றதுண்டு,அந்
நேரம் அச்சு இயந்திரங்களைப் பார்த்து வியந்ததுண்டு. இன்றும் கல்முனைக்குப் போகும்போது அந்த இடத்தைப் பார்த்து பெருமூச்சு விடுவதுடன்,பசுபதி அக்காவையும்
நினைப்பதுண்டு. தேற்றாத்தீவில் ஆரம்பக்கல்வியை அனைவருக்கும் ஆரம்பித்து வைத்தவர் அல்லவா.

திரு செல்வராசகோபால் அவர்களை நான் அறிந்திருந்தாலும்,அந்த வயதில் அவர் பெருமை எனக்குத் தெரியவில்லை. பின்னர் அவரது மைத்துனர் திரு.பிரவுன் கிரகெரி
இராஜதுரை (இராஜ பாரதி) அவர்கள் மூலம்தான் இவர பெருமைகளைஅறியக்கூடியதாக இருந்தது. காலங் கடந்த ஞானம் என்றாலும்,இவரது புத்தகங்களைத் தேடிப்பிடித்துப்
படிப்பதன் மூலம் அந்தக் குறை நிறைவேறியது. ஆனாலும் அவரது ஆக்கங்கள் மட்டக்களப்பு மக்கள் கைகளில் கிடைக்காமல், சூறவளியும், சுனாமியும் சதி செய்தது,
காலத்தின் கொடுமை.

இலக்கியமணியின் இனிய வாழ்க்கைக்குறிப்புகளை கீழ்வரும் இணைய தளங்களில்
சென்று பாருங்கள்.
  http://muelangovan.blogspot.com/2010/12/blog-post_941.html
http://www.palakani.com/showthread.php?tid=453

சூடாமணி உள்ளமுடையான்.

சோதிடத்தில் ஆர்வமுள்ளவர்களுக்கு இப்பதிவு சமர்ப்பணம்.சோதிடத்தை விரும்பிப் படிபவர்களுக்கு இது ஒரு புதையல்.சோதிடத்தில் நம்பிக்கை இல்லாதவர்கள் தயவு செய்து படிக்க வேண்டாம்.

நட்சத்திரங்களின் மறு பெயர்கள்

புகலுருபரிமா வாசி புரவியேறுரசுஞ் சென்னி
இகலுறு குதிரைமுந்நா ளிரலையைப் பசியின்பேராம்
மகலிய தாழிபூத மடுப்பொடு தராசு கங்குல்
பகல்வறு கிழவன் சோறு பரணியின் பெயராமே. 01

அசுவினி நட்சத்திரத்தின் மறு பெயர்கள்::
பரி, மா வசி,புரவி,துரகம், சென்னி, குதிரை, முன்நாள், இரலை.

பரணி நட்சத்திரத்தின் மறு பெயர்கள்::
தாழி,பூதம்,அடுப்பு, தராசு, கங்குல், கிழவன்,சோறு.

ஆரலே யழலேயங்கி அலகிறாலறு மீனாவி
சீர்கொள் கார்த்திகைப் பேராகுந் தெருருளயனாள் வையம்
பார் சகடு ரோகணிப் பேர் பரவு மான்றலை யைந்தானம்
மார்கழி மதி பேராளன் நரிப்புறமிருகசீரப் பேர் -02

கார்த்திகையின்  பெயர்:
ஆரல்,அழல்,அங்கி,அளகு,இறால்,அறுமீன்,ஆவி.

ரோகிணியின் பெயர்.
தேருருள்,அயன்நாள்,வையம், சகடு.

மிருகசீரிடத்தின் பெயர்:
மான்றலை,ஐந்தானம்,மார்கழி, மதிபேராளன்,நரிப்புறம்.

பேரிறை செங்கை யாழ்வில் லாதிரைப் பெயராம்பிண்டி
கார்திரள் மூங்கில்மாலை கரும்பொடா வணமேவிண்டல்
கூரிய புநர் தமாகுங் குடந்தரா கொடிறுதையம்
பார்மதி பூசப்பேராம் பணிநாள் கவ்வை பாம்பாயில்யம்.03

திருவாதிரையின் பெயர்:
இறை,செங்கை,யாழ்,வில்,

புணர்பூசத்தின் பெயர்:
பிண்டிகார், திரள்,மூங்கில், மாலை,கரும்பு,ஆவணம்,விண்டம்,புனர்தம்.

பூசத்தின் பெயர்:
குடம், தரா, கொடிறு,தையம், மதி,

ஆயில்யத்தின் பெயர்:
அரவினாள்,கவ்வை,பாம்பு.

பாவுமுற் சனியே வாயக்கால் வேட்டுவனெழிலி பாரிற்
கூவிய ஞமலி மாசி கொடு நுகமகப்பேர் துர்க்கை
நாவிதனெலியே மாற்றை யிடைச்சனி பூரனாம்
மோவில் பாற்குனி பங்குனி கடைச்சனி யுத்தரப் பேர். 04

மக நட்சத்திரத்தின் மறு பெயர்கள்:
முற்சனி,வாய்க்கால், வேட்டுவன், எழிலி,ஞமலி,மாசி,கொடுநுகம்.

பூர நட்சத்திரத்தின் மறு பெயர்கள்:
துர்க்கை,நாவிதன்,எலி, இடைச்சனி.

உத்தர நட்சத்திரத்தின் மறு பெயர்கள்:
பாற்குனி,பங்குனி,கடைச்சனி.

உத்தமக் களிறு நவ்வி யுயர் கெளத்துவ மாங்கைம்மீன்
அத்தமென் கன்னியாடை யாம்பரம் பயறு நெய்மீன்
சித்திரப் பெயர் மரக்கால் பதுமமே தீபஞ்சோதி
மொத்த வைகாசி முற்றில் சுளகுடன் முறம் விசாகம்.  05

அத்த நட்சத்திரத்தின் மறு பெயர்கள்:
களிறு,நவ்வி,கெளத்துவம்,கைமீன்.

சித்திரை நட்சத்திரத்தின் மறு பெயர்கள்:
கன்னி,ஆடை,ஆம்பரம்,பயறு,நெய்,மீன்.

சுவாதி நட்சத்திரத்தின் மறு பெயர்கள்:
மரக்கால்,பதுமம்,தீபம்.

விசாகம் நட்சத்திரத்தின் மறு பெயர்கள்:
வைகாசி,முற்றில், சுளகு,முறம்.

விசைகொள் புற்றாளி புன்றேள் மெய்ப்பெண்ணையனுடப்பேரா
மாசி வில் வல்லாரை வாளி துடங் கொளி கேட்டையாகுந்
திசையுறு குருகு கொக்கு தேட்கடையாணி மூலம்
வசையிலாக்குளமே பொய்கை வாவி பூரடமாமே. 06

அனுஷ நட்சத்திரத்தின் மறு பெயர்கள்:
புல்,தாளி,தேள்,பெண்ணை.

கேட்டை நட்சத்திரத்தின் மறு பெயர்கள்:
வல்லாரை,வாளி,துடங்கொளி.

மூல நட்சத்திரத்தின் மறு பெயர்கள்:
குருகு,கொக்கு,தேட்கடை ஆனி

பூராட நட்சத்திரத்தின் மறு பெயர்கள்:
குளம்,பொய்கை, வாவி.

மானெனிற்குளமேகூவன் மணிமுடியாடையூர்தி
கானவுத்தரடாஞ்சோணை சிரவண முலக்கை யோண
மானபுட் பறவை காக்கை யாவணி யவிட்டைப்பேராந்
தேனனாய் சுண்டன் குன்று செக்கிவை சதையம் செப்பே.

உத்தராட நட்சத்திரத்தின் மறு பெயர்கள்:
குளம்,கூவல்,மணிமுடி,ஆடை,ஊர்தி.

திருவோணம் நட்சத்திரத்தின் மறு பெயர்கள்:
சோணை,சிரவணம்,உலக்கை.

அவிட்டம் நட்சத்திரத்தின் மறு பெயர்கள்:
புள்,பறவை,காக்கை,ஆவணி,

சதய நட்சத்திரத்தின் மறு பெயர்கள்:
சுண்டன்,குன்று,செக்கு.

செவ்விய கொழுங்கோல் நாழி புரட்டை சீர் புரட்டாதி
யவ்விய முரசு வேந்த னறிவனுத்தரடாதிப் பேர்
வவ்விய கடைமீன் தோணி மரக்கலஞ்சூலம் நாவாய்
நவ்விதரேவதிப்பே ரவைதினம் நாட்பொதுப் பேர்.

பூரட்டாதி நட்சத்திரத்தின் மறு பெயர்கள்:
கொழுங்கோல்,நாழி,புரட்டை.

உத்தரட்டாதி நட்சத்திரத்தின் மறு பெயர்கள்:
முரசு,வேந்தன்,அறிவன்.

ரேவதி நட்சத்திரத்தின் மறு பெயர்கள்:
கடைமீன்,தோணி,மரக்கலம்,சூலம்,நாவாய்,

வியாழன், 23 டிசம்பர், 2010

பாரதிதாசனின் பொதினாத் துவையல்.

பொதினாத் துவையலின் அருமையைக் கூறும் புரட்சிக் கவிஞ்ஞரின் வெண்பா இது.

ஆய ஒருத்தி அரைக்க இரண்டுபேர்
போயதை வழிக்க ஐந்து பூவைமார் --ஓயார்கள்
நாவிலிட மூன்றுபேர் நண்ண வேண்டும் பொதி
நாவிலிட்ட நல்ல துவையல்.

ஒருத்தி -ஒருகை
இரண்டு பேர் -இரண்டுகைகள்
ஐந்து பூவைமார்-ஐந்து விரல்கள்
நாவிலிட மூன்று பேர்- சுட்டுவிரல், நடுவிரல்,பெருவிரல்.

பொதினாவைத் துவைத்து, சுவைத்துப் பாருங்கள்.

ஞாயிறு, 5 டிசம்பர், 2010

துன்பத்தில் இருந்து வெளிப்பட.

துன்பத்தில் இருந்து வெளிப்பட.

மனிதர்களாகிய நாம்,இன்னல்களில் இருந்து வெளிப்பட,எந்தவித செலவுமில்லாமல்.
திருமூலர் நான்கு வரிகளில் நல்ல வழியைக் காட்டியுள்ளார்.முடிந்தவர்கள். ஏன்? எல்லாராலும் இதைக் கைக்கொள்ள முடியும். முயற்சி செய்து பாருங்கள்.காசி ராமேஸ்வரம் போகமுடியவில்லையே?தான தருமம் பன்னமுடியவில்லையே என்று
அங்கலாய்ப்பவர்கள்.இந்த நாலு வரியை வாசித்துப் பாருங்கள். நறுக்குத் தெறித்தாற்போல், எவ்வளவு எளிமையாக,இலகுவாக,யாவர்க்கும் புரியும்படி,
அழகாக தருமம் என்பது என்ன என்பதை விளக்கியுள்ளார்.உங்கள் மனதை இன்னல்களில் இருந்து,இலகுவாக வெளிக்கொணரலாம்.எனக்கு விளங்கிய முறையில் இதை எழுதியுள்ளேன்,இதை விட திறமையான முறையில் யாரும் எழுதியிருந்தாலும்
சொல்லுங்கள் திருத்திக் கொள்வோம்.

யாவர்க்கும் ஆம் இறைவற்கொரு பச்சிலை
யாவர்க்கும் ஆம் பசுவுக்கொரு வாய் உறை
யாவர்க்கும் ஆம் உண்ணும் போதொரு கைப்பிடி
யாவர்க்கும் ஆம் பிறர்க்கு இன்னுரைதானே. (திருமூலர் திருமந்திரம்)

இறைவனைப் பூசிப்பதற்கு ஒரு பச்சிலை போதும்.பசுவுக்கு ஒரு கைப்பிடி அளவு புல் கொடுத்தால் அதுவே பெரிய ஜீவா காருன்யமாகும். உணவு உண்ணும் போது,ஒரு கவளம் உணவு தருமம் செய்தல்.பிறர் மணம் நோகாதவாறு, இனிய மொழிகளைப்
பேசுதல்.இவ்வாறு வாழத் தினமும் பழகிக் கொண்டாலே,வாழ்வில் துன்பம் என்றும்
நெருங்காது.

சனி, 4 டிசம்பர், 2010

சிரிப்...பூ

சிரிப்...பூ.

நகைச்சுவை நடிகர் என்.எஸ்.கிருஷ்ணன் சிரிப்புக்குக் கொடுத்துள்ள விளக்கம்,உங்களையும் கவரும்,கேட்டு ரசியுங்கள்.

வியாழன், 25 நவம்பர், 2010

காணக் கிடைக்காத வல்லுகங்கள்.

நீங்கள் வேறு எதையாவது நினைத்து வேறு எதையோ கற்பனை பண்ணினால் நான் பொறுப்பாளி அல்ல. ஓவர் டு போடோஸ் மின் அஞ்சலில்கிடைத்தது.

மின் அஞ்சலில் கிடைத்தது.நீங்களும் பார்த்து ரசியுங்கள்.

பைகள் என்பதை தமிழில் வல்லுகம் என்றும் சொல்லுவார்கள் தமிழில். வெற்றிலை வல்லுகம்.வெற்றிலை பாக்கு, சுண்ணாம்பு,புகையிலை.மேலும் அதற்குத் தேவையானவை எல்லாம்,அதற்குள் இருக்கும்.மொத்தத்தில் ஒரு களஞ்சிய சாலை.